admin
लातूर: प्रतिनिधी
लातूर येथील जवाहर नवोदय विद्यालयात सहावीत शिकणाऱ्या १२ वर्षीय विद्यार्थिनीचा मृतदेह वसतिगृहात संशयास्पद अवस्थेत आढळल्याने संपूर्ण जिल्ह्यात खळबळ उडाली आहे. अनुष्का किरण पाटोळे असे या मृत विद्यार्थिनीचे नाव असून, ती औसा तालुक्यातील टाका येथील रहिवासी होती. रविवारी (४ जानेवारी) सकाळी ७:३० च्या सुमारास अनुष्काचा मृतदेह वसतिगृहातील खोलीत लटकलेल्या अवस्थेत आढळला.
नेमकी घटना काय?
मिळालेल्या माहितीनुसार, अनुष्का ही अत्यंत हुशार आणि चुणचुणीत विद्यार्थिनी होती. रविवारी सकाळी ती मृतावस्थेत आढळल्यानंतर शाळा प्रशासनाने तिच्या वडिलांना फोन करून ती आजारी असल्याचे सांगितले. मात्र, वडील शाळेत पोहोचले तेव्हा त्यांना अनुष्काचा मृत्यू झाल्याचे समजले. पोलिसांनी प्राथमिक तपासात ही आत्महत्या असल्याचे म्हटले असले तरी, अनुष्काच्या शरीरावर आणि हातावर जखमांच्या खुणा आढळल्याने या प्रकरणाला संशयास्पद वळण मिळाले आहे.
नातेवाईकांचा संताप आणि गांधी चौकात ‘रास्ता रोको’
अनुष्काने आत्महत्या केली नसून तिचा घातपात करण्यात आला आहे, असा गंभीर आरोप तिच्या कुटुंबीयांनी केला आहे. “माझ्या मुलीला मारहाण करण्यात आली आहे,” असा आक्रोश तिच्या आईने केला. या घटनेच्या निषेधार्थ आणि दोषींवर कारवाईच्या मागणीसाठी सोमवारी (५ जानेवारी) लातूरच्या ऐतिहासिक गांधी चौकात महिलांनी आणि नातेवाईकांनी आक्रमक पवित्रा घेतला. महिलांनी साड्यांच्या दोऱ्या करून रस्ता अडवला, ज्यामुळे शहरातील वाहतूक अनेक तास ठप्प झाली होती.
पालकांचे गंभीर आरोप
या घटनेनंतर नवोदय विद्यालयातील इतर पालकांनीही शाळेतील शिस्तीच्या नावाखाली होणाऱ्या मारहाणीबद्दल तक्रारी केल्या आहेत. काही विद्यार्थ्यांच्या मते, घटनेच्या आदल्या रात्री एका कर्मचाऱ्याने अनुष्काला मारहाण केली होती. या सर्व आरोप-प्रत्यारोपामुळे विद्यालय प्रशासनाविरुद्ध संतापाची लाट उसळली आहे.
पोलीस तपास सुरू
एमआयडीसी पोलिसांनी या प्रकरणी अकस्मात मृत्यूची नोंद केली असून, मृतदेह उत्तरीय तपासणीसाठी लातूरच्या शासकीय वैद्यकीय महाविद्यालयात पाठवण्यात आला आहे. “जोपर्यंत दोषींवर खुनाचा गुन्हा दाखल होत नाही, तोपर्यंत मृतदेह ताब्यात घेणार नाही,” अशी भूमिका नातेवाईकांनी घेतली होती. सद्यस्थितीत विद्यालय परिसरात मोठा पोलीस बंदोबस्त तैनात करण्यात आला असून, पोलीस अधिक तपास करत आहेत.
admin1
