admin
पुणे: प्रतिनिधी
पुणे जिल्ह्यातील ऐतिहासिक मढेघाट परिसरात रविवार, ४ जानेवारी २०२६ रोजी दुपारी १ वाजेच्या सुमारास ट्रेकिंगचा आनंद लुटण्यासाठी गेलेल्या विद्यार्थ्यांच्या एका मोठ्या गटावर मधमाशांनी भीषण हल्ला केला. पुण्यातील एका खासगी साहसी पर्यटन संस्थेमार्फत आयोजित केलेल्या या ट्रेकमध्ये सुमारे ५० हून अधिक विद्यार्थी आणि त्यांचे प्रशिक्षक सहभागी झाले होते. मढेघाट ते उपंडा या मार्गावरून घाट उतरत असताना हा थरार घडला. झाडावरील आग्या मोहोळाच्या मधमाशा अचानक उठल्या आणि त्यांनी विद्यार्थ्यांवर हल्ला चढवला.
या अनपेक्षित हल्ल्यामुळे विद्यार्थ्यांमध्ये प्रचंड घबराट पसरली आणि जीव वाचवण्यासाठी विद्यार्थी डोंगरदऱ्यात सैरभैर धावू लागले. या घटनेत ३५ हून अधिक विद्यार्थी आणि प्रशिक्षक मधमाशांच्या दंशामुळे जखमी झाले असून, त्यापैकी सहा जणांची प्रकृती चिंताजनक आहे. जखमींना सुरुवातीला वेल्हे येथील ग्रामीण रुग्णालयात दाखल करण्यात आले, मात्र प्रकृती खालावल्यामुळे गंभीर जखमींना तातडीने पुण्यातील खासगी रुग्णालयात हलवण्यात आले आहे. मधमाशांनी विद्यार्थ्यांच्या शरीरावर अनेक ठिकाणी दंश केले असून काहींना श्वास घेण्यास त्रास आणि चक्कर येण्याचे लक्षणे जाणवत आहेत.
घटनेची माहिती मिळताच केळद गावचे स्थानिक ग्रामस्थ मदतीसाठी धावून आले. स्थानिकांनी धुराचा वापर करून मधमाशांना पांगवले आणि डोंगरदऱ्यात अडकलेल्या मुलांना सुरक्षित बाहेर काढले. १०८ क्रमांकाच्या रुग्णवाहिकांनी तातडीने घटनास्थळी पोहोचून जखमींना प्राथमिक उपचार दिले. सह्याद्रीच्या रांगांमध्ये सध्या थंडीचे दिवस असल्याने आग्या मोहोळाच्या माशा अधिक आक्रमक असतात, त्यामुळे पर्यटकांनी आणि ट्रेकर्सनी खबरदारी घेण्याचे आवाहन प्रशासनाकडून करण्यात आले आहे.
admin1
